తెలంగాణలో టికెట్ రేట్ల పెంపు కావాలంటే తొంబై రోజుల ముందే అప్లై చేసుకోవాలని గతంలో హైకోర్టు ఇచ్చిన ఉత్తర్వులను నిన్న సుప్రీమ్ కోర్టు నిలువరించడం ఇండస్ట్రీ వర్గాల్లో ఎక్కడ లేని సంతోషాన్ని తీసుకొచ్చింది. ఎందుకంటే ప్రతిసారి ఈ వ్యవహారం పెద్ద తలనొప్పిగా మారింది. ఎవరో ఒకరు కేసులు వేయడం, మంత్రులు సంజాయిషి ఇచ్చుకోవాల్సి రావడం, ప్రొడ్యూసర్లు లాయర్ల చుట్టూ తిరగడం గత ఆరేడు నెలల నుంచి జరుగుతోంది.
ఇప్పుడు టెన్షన్ లేదు. నైజామ్ లో ఉస్తాద్ బెనిఫిట్ షోలు పడతాయి. టికెట్ హైక్స్ కోసం రెగ్యులర్ పద్ధతి లోనే విన్నపం చేసుకోవచ్చు. అనుమతులు కూడా వస్తాయి. కాకపోతే ఆల్రెడీ గరిష్టంగా 295 రూపాయలు ఉన్న మల్టీప్లెక్స్ ధరను ఇంకా పెంచుకుంటారా అనేది వేచి చూడాలి. ఏపీలో ఎలాంటి ఇబ్బంది లేదు. అడగటం ఆలస్యం పర్మిషన్లు వస్తున్నాయి. పవన్ మూవీకి పది రోజుల పాటు స్పెషల్ రేట్ల మీద షోలు వేసుకునేందుకు అఫీషియల్ ముద్ర పడిపోయింది.
ఈ ఏడాది చాలా ప్యాన్ ఇండియా మూవీస్ రాబోతున్నాయి. పెద్ది, ప్యారడైజ్, విశ్వంభర, ఫౌజీ, ఎన్టీఆర్ – నీల్, బాలయ్య 111, స్వయంభు, నాగబంధం, టాక్సిక్ ఇలా పెద్ద క్యూ ఉంది. వీటిలో అన్నింటికి పెంపు అడుగుతారని చెప్పలేం కానీ టయర్ 1 హీరోల బడ్జెట్ లు రికవర్ కావాలంటే మాత్రం తప్పదు. అయితే ఇక్కడితో టెన్షన్ అయిపోయిందని చెప్పడానికి లేదు. ఏదైనా కొత్త మెలికతో మళ్ళీ ఎవరైనా ఈ ఇష్యూ మీద న్యాయస్థానం మెట్లు ఎక్కితే ఇబ్బందులు తప్పవు.
ప్రస్తుతానికి ఒక పెద్ద గందరగోళానికి తెరపడింది. అది కూడా ఉస్తాద్ భగత్ సింగ్ లాంటి కమర్షియల్ మూవీతో బోణీ జరగడం శుభ పరిణామం. పాజిటివ్ టాక్ వస్తే మాత్రం రెండు తెలుగు రాష్ట్రాల్లో వసూళ్ల సునామి ఓ రేంజ్ లో ఉంటుంద్. దురంధర్ రివెంజ్ తో పోటీ ఉన్నప్పటికీ పవన్ అభిమానులు ఆందోళన చెందడం లేదు. ఓజి టాక్ వచ్చినా చాలు ఉస్తాద్ సేఫ్ గా బ్లాక్ బస్టర్ అయిపోతుందని నమ్మకం పెట్టుకున్నారు. ట్రైలర్ చూశాక దీని మీద ఒక అంచనాకు రావొచ్చు.