ఇండియాస్ మోస్ట్ లవ్డ్ సీక్రెట్ ఏజెంట్ శ్రీకాంత్ తివారి.. మళ్లీ బుల్లెతెరల్లోకి వచ్చేశాడు. మనోజ్ బాజ్ పేయి ప్రధాన పాత్రలో రాజ్-డీకేల ‘ఫ్యామిలీ మ్యాన్’ సిరీస్ నుంచి మూడో సీజన్ శుక్రవారమే స్ట్రీమింగ్కు వచ్చింది. గత రెండు సీజన్ల టెంపోను మూడో సీజన్లోనూ టీం కొనసాగించింది. సీజన్-3 కూడా పాజిటివ్ రివ్యూలు, ఫీడ్ బ్యాక్ తెచ్చుకుంది.
ఈసారి కథను ఈశాన్య రాష్ట్రాల్లోకి మళ్లించిన రాజ్-డీకే.. ఏడు ఎపిసోడ్లను రసవత్తరంగా నడిపించి మెప్పించారు. కాకపోతే జైదీప్ అహ్లావత్ చేసిన విలన్ పాత్ర కొంచెం వీక్గా ఉండడం.. గత రెండు పార్ట్స్లో మాదిరి పెద్ద ట్విస్టుల్లేకపోవడం కొంతమేర ప్రేక్షకులను నిరాశపరిచినట్లు కనిపిస్తోంది. కానీ సిరీస్ ఎక్కడా బోర్ కొట్టకుండా సాగిపోయిందనడంలో మాత్రం సందేహం లేదు. ఎప్పట్లాగే కామెడీ, ఫ్యామిలీ డ్రామా పండడం.. దానికి తోడు థ్రిల్స్ కూడా ఉండడంతో సిరీస్ సాఫీగా సాగిపోయింది.
ఐతే ‘ఫ్యామిలీ మ్యాన్-3’ క్లైమాక్స్ ప్రేక్షకులను కొంత అయోమయానికి గురి చేసింది. చివర్లో విలన్ని హీరో పట్టుకోలేకపోతాడు. మధ్యలో తీవ్రంగా గాయపడి ఊపిరి వదిలేసినట్లుగా మనోజ్ను చూపించే షాట్ దగ్గర సిరీస్ను ముగించారు. దీంతో శ్రీకాంత్కు ఏమైంది.. విలన్ ఏమయ్యాడు అనే ప్రశ్నలతో సిరీస్ ముగిసింది. మొత్తానికి సిరీస్కు రాజ్-డీకే శుభం కార్డు వేయలేదన్నది స్పష్టం. ‘ఫ్యామిలీ మ్యాన్-1’లోనూ ఇలాంటి ముగింపే ఉంటుంది. అందులో తలెత్తే ప్రశ్నలకు సీజన్-2లో జవాబిచ్చారు.
ఇప్పుడు కూడా అదే స్టైల్ ఫాలో అయినట్లు కనిపిస్తోంది. వీలైనంత త్వరగా సీజన్-4ను ప్రేక్షకుల ముందుకు తెచ్చే ప్రయత్నంలో ఉన్నట్లున్నారు రాజ్-డీకే. అందులో ఈ కథకు ముగింపు ఇవ్వడమే కాక.. శ్రీకాంత్ను చివరగా ఇంకో మిషన్లోకి దించి అంతిమంగా ఈ సిరీస్కు ఎండ్ కార్డ్ వేస్తారనే చర్చ జరుగుతోంది. నాలుగో సీజన్ తర్వాత కూడా కథను కొనసాగిస్తూ టూమచ్ అవుతుందని.. అందుకే ఆ సీజన్తో ‘ఫ్యామిలీ మ్యాన్’ను మొత్తంగా ముగించేస్తారని అంటున్నారు.
