నందమూరి బాలకృష్ణ కెరీర్ ఇప్పుడు మామూలు ఊపులో లేదు. యన్.టి.ఆర్: కథానాయకుడు, యన్.టి.ఆర్: మహానాయకుడు, రూలర్ సినిమాలతో పతనం చూసిన ఆయన.. మళ్లీ పుంజుకుంటాడని ఎవ్వరూ అనుకోలేదు. కానీ అఖండ, భగవంత్ కేసరి, వీరసింహారెడ్డి, డాకు మహారాజ్ చిత్రాలతో వరుస విజయాలందుకుని కెరీర్లో మళ్లీ పీక్స్ను అందుకున్నాడు నందమూరి హీరో. ఇక ‘అఖండ-2’ ఆయన కెరీర్ను మరో స్థాయికి తీసుకెళ్తుందని అంచనా వేస్తున్నారు.
‘అఖండ’కు సీక్వెల్ కావడం.. పాన్ ఇండియా ట్రెండును ఫాలో అవుతుండడంతో ఈ సినిమా వర్కవుట్ అయితే ఫలితం ఎవ్వరూ ఊహించని స్థాయిలో ఉండొచ్చని భావిస్తున్నారు. ఐతే డిసెంబరు 5న రిలీజ్ కాబోతున్న ఈ చిత్రానికి ప్రమోషన్ల జోరు పెంచట్లేదని అభిమానులు కొంచెం ఫీలవుతున్నారు. కానీ టీం వ్యూహాత్మకంగానే అడుగులు వేస్తోంది.
దసరా, దీపావళి పండుగలకు క్రేజీ సినిమాలు రిలీజయ్యాయి. బాక్సాఫీస్ రష్ ఉంది. ఈ హడావుడి అంతా అయ్యాక ‘అఖండ-2’ ప్రమోషన్లను మొదలుపెట్టాలని చూస్తున్నట్లు కనిపిస్తోంది. పండుగ టైంలో మిగతా సినిమాలతో కలిసి రావడం కన్నా.. కొన్ని రోజుల గ్యాప్ తర్వాత విడిగా తమ కంటెంట్ను ప్రేక్షకుల ముందు పెట్టాలని భావిస్తున్నట్లు సమాచారం. ఈ నెల 24న ‘అఖండ-2’ కొత్త టీజర్ రాబోతోందట. నిమిషం పైగా నిడివి ఉండే ఈ ప్రోమో ఒక బ్లాస్ట్ లాగా ఉంటుందని అంటున్నారు.
పాన్ ఇండియా స్థాయిలో బజ్ పెంచేలా ఈ ప్రోమోను దర్శకుడు బోయపాటి శ్రీను డిజైన్ చేశాడట. డివైన్ ఎలిమెంట్స్ ఉన్న కథకు భారీతనం జోడిస్తే.. దేశవ్యాప్తంగా ఆ సినిమాకు బజ్ వస్తోంది. ‘అఖండ-2’ అచ్చంగా అలాంటి సినిమానే. ఈ టీజర్ తర్వాత లెక్క వేరుగా ఉంటుందని.. ఇక్కడ్నుంచి మొదలుపెట్టి సినిమా రిలీజ్ వరకు క్రమం తప్పకుండా అప్డేట్స్ ఇస్తూనే ఉంటారట. షూటింగ్ పూర్తి చేసుకున్న సినిమా.. ప్రస్తుతం ప్రి ప్రొడక్షన్ దశలో ఉంది. డిసెంబరు 5న ‘అఖండ-2’ ప్రేక్షకుల ముందుకు రానున్న సంగతి తెలిసిందే.
