దర్శకుడు అనిల్ రావిపూడి అందరి అంచనాలకు ఝలక్ ఇస్తూ తన కొత్త సినిమా ప్రకటన ఇచ్చేశారు. హీరో వెంకటేష్ తో పాటు మరో కథానాయకుడు ఎవరనే సస్పెన్స్ గురించి గత కొన్ని రోజులుగా చాలా లీకులు వచ్చాయి. ముఖ్యంగా ఫహద్ ఫాసిల్, కార్తీ పేర్లు బలంగా వినిపించాయి.
అయితే నిజంగా సంప్రదింపులు జరిగాయో లేక ఏదైనా కారణాల వల్ల వద్దనుకున్నారో ఏమో కానీ ఫైనల్ గా నందమూరి కళ్యాణ్ రామ్ లాక్ కావడం ఎవరూ అనుకోని కొత్త ట్విస్టు. అనిల్ రావిపూడిని నమ్మి పటాస్ రూపంలో తొలి అవకాశం ఇచ్చింది కళ్యాణ్ రామే. డెబ్యూతోనే సూపర్ డూపర్ హిట్ ఇచ్చింది ఈ కాంబో.
తర్వాత ఈ కలయిక మళ్ళీ సాధ్యపడలేదు. పటాస్ 2 కోసం అప్పుడప్పుడు అభిమానులు డిమాండ్ చేస్తున్నా అప్పటికే అనిల్ రావిపూడి పూర్తిగా ఫన్ జోన్ లోకి వెళ్లిపోయారు. ఇన్నేళ్ల తర్వాత మళ్ళీ చేతులు కలపడం విశేషమే. వెంకటేష్, కళ్యాణ్ రామ్ ఆన్ స్క్రీన్ కాంబో డిఫరెంట్ గా ఉండబోతోందనేది అర్థమవుతోంది.
ఎక్కువ యాక్షన్ కమర్షియల్ సినిమాలు చేసినప్పటికీ కళ్యాణ్ రామ్ కామెడీ కూడా పండించగలడని కొన్ని శాంపిల్స్ పటాస్ లో చూపించాడు అనిల్ రావిపూడి. తర్వాత ఈ యాంగిల్ ఇతర దర్శకులు వాడుకోవడంలో విఫలమయ్యారు. ఇప్పుడు తిరిగి ఇంకో ఛాన్స్ వచ్చేసింది.
అనుకున్నట్టే 2027 సంక్రాంతి విడుదలని అఫీషియల్ గా ప్రకటించారు. ఒక్కసారి అనౌన్స్ చేశాక ఎట్టి పరిస్థితుల్లో దాన్ని మిస్ కాకుండా చూసుకోవడం అనిల్ రావిపూడికు మాత్రమే సాధ్యమైన విద్య. సో ఎలాంటి అనుమానాలు పెట్టుకోనక్కర్లేదు. దీనికి చాలా పొడవైన టైటిల్ లాక్ చేశారని తెలిసింది.
ఇప్పటికిప్పుడు దీన్ని ప్రకటించకపోవచ్చు కానీ సరైన సందర్భం చూసి రివీల్ చేస్తారు కానీ కొంచెం టైం పడుతుంది. ఆల్రెడీ వచ్చినా లీకుల ప్రకారం ఇందులో వెంకటేష్, కళ్యాణ్ రామ్ బావ బావమరిదిగా కనిపించబోతున్నారు. ఈ ఇద్దరు ప్లస్ భార్యల మధ్య కామెడీ ప్రధాన హైలైట్ గా ఉంటుందని చెబుతున్నారు.
