16 ఏళ్ల కిందట వచ్చిన ‘అవతార్’ సినిమా ప్రపంచవ్యాప్తంగా ఎలాంటి సంచలనం రేపిందో తెలిసిందే. ఆ కథకు, ఆ విజువల్స్కు, ఆ ఎఫెక్ట్స్కు ప్రేక్షకులు ఫిదా అయిపోయారు. ప్రపంచ సినీ చరిత్రలోనే అత్యధిక వసూళ్ల రికార్డును అందించారు. ఆ చిత్రం సాధించిన అసాధారణ విజయం చూసి దర్శక నిర్మాత ఒకేసారి నాలుగు సీక్వెల్స్ ప్రారంభించాడు.
తొలి సీక్వెల్ ‘అవతార్: ది వే ఆఫ్ వాటర్’ మూడేళ్ల కిందట రిలీజైంది. కానీ అంచనాలను పూర్తిగా అందుకోలేకపోయింది. ప్రి రిలీజ్ బజ్ వల్ల వసూళ్లయితే భారీగా వచ్చాయి. ఐతే నాలుగు రోజుల కిందట రిలీజైన కొత్త సీక్వెల్ ‘అవతార్: ఫైర్ అండ్ యాష్’ మాత్రం ఇటు పాజిటివ్ రివ్యూలూ తెచ్చుకోలేకపోయింది, అటు ఆశించిన కలెక్షన్లూ సాధించలేకపోతోంది. ‘అవతార్-2’ ఇండియాలో ఓపెనింగ్ వీకెండ్లో సాధించిన వసూళ్లలో సగం కూడా రాబట్టలేకపోయింది ‘అవతార్-3’.
‘అవతార్: ది వే ఆఫ్ వాటర్’కు మిక్స్డ్ టాక్ వచ్చినా సరే.. తొలి వీకెండ్లో రూ.137 కోట్ల దాకా వసూళ్లు కొల్లగొట్టింది. కానీ ‘అవతార్: ఫైర్ అండ్ యాష్’ ఇండియా వీకెండ్ వసూళ్లు రూ.60 కోట్లకు పరిమితం అయ్యాయి. కొన్ని వారాలుగా ఇండియన్ బాక్సాఫీస్ను దున్నేస్తున్న ‘దురంధర్’ ముందు ‘అవతార్-3’ నిలవలేకపోయింది. కొత్త సినిమా అయిన ‘అవతార్-3’ను పాత చిత్రమైన ‘దురంధర్’ మూడు రోజుల్లో పూర్తిగా డామినేట్ చేసింది. ఆ చిత్రానికి మూడో వీకెండ్లో రూ.95 కోట్ల దాకా వసూళ్లు రావడం విశేషం.
‘అవతార్-3’ అంచనాలను అందుకోలేకపోవడం ‘అఖండ-2’కు కూడా బాగానే కలిసొచ్చింది. రెండో వీకెండ్లో ఆ చిత్రం మంచి వసూళ్లే రాబట్టింది. కేవలం విజువల్స్ కోసం మంచి స్క్రీన్లలో ఈ సినిమా చూడాలి తప్ప.. అంతకుమించి ఇందులో విశేషమేమీ లేదనే అభిప్రాయం జనాల్లోకి బలంగా వెళ్లడంతో ‘అవతార్-3’ని ఆడియన్స్ లైట్ తీసుకున్నట్లు కనిపిస్తోంది.
