బాహుబలి తర్వాత రెబల్ స్టార్ ప్రభాస్ నుంచి ఏ సినిమా విజయవంతం అయినా.. దానికి సీక్వెల్ అనౌన్స్ చేసేస్తున్నారు. తన లేటెస్ట్ మూవీ ‘రాజాసాబ్’ సక్సెస్ అయి ఉంటే దానికీ సీక్వెల్ ఉండేది. కానీ రాజాసాబ్ ఆశించిన ఫలితాన్ని అందుకోకపోవడంతో పార్ట్-2 అటకెక్కినట్లే. ఐతే దీని కంటే ముందు సలార్-2, కల్కి-2 చిత్రాలను ప్రకటించిన సంగతి తెలిసిందే.
కానీ మరోవైపు ప్రభాస్ లైనప్ ఫుల్ ప్యాకప్ అయిపోవడంతో ఆ సీక్వెల్స్ ఎప్పుడు మొదలవుతాయో.. ఎప్పుడు ప్రేక్షకుల ముందుకు వస్తాయో తెలియట్లేదు. ‘సలార్-2’ అయితే అసలు ఉంటుందో లేదో అన్న సందేహాలు కూడా కలుగుతున్నాయి. దర్శకుడు ప్రశాంత్ నీల్ ఇప్పుడిప్పుడే దాన్ని టేకప్ చేసే స్థితిలో కూడా లేడు. కానీ ‘కల్కి-2’ కోసం మాత్రం టీం చాన్నాళ్ల నుంచే కష్టపడుతోంది. దర్శకుడు నాగ్ అశ్విన్ ‘కల్కి’ రిలీజైన కొన్ని నెలల నుంచే దీని మీద పని చేస్తున్నాడు.
తాజాగా ‘కల్కి-2’ గురించి సంగీత దర్శకుడు సంతోష్ నారాయణన్ అప్డేట్ ఇచ్చాడు. ఈ సినిమా కోసం తన పని ముందే మొదలైనట్లు తెలిపాడు. సంగీత దర్శకుడిగా ‘కల్కి’ తన కెరీర్లో అత్యంత పెద్ద సినిమా అని.. దాన్నుంచి ఎంతో నేర్చుకున్నానని.. ఇప్పుడు ‘కల్కి-2’ కోసం తన వర్క్ ఆల్రెడీ మొదలైందని అతను చెప్పాడు. కల్కి-2 తన కెరీర్లో బెస్ట్ వర్క్ కాబోతోందని అతను పెద్ద స్టేట్మెంటే ఇచ్చాడు. దాని కోసం తనతో పాటు టీం అంతా చాలా ఎఫర్ట్ పెడుతోందని సంతోష్ తెలిపాడు.
‘కల్కి-2’లో ముఖ్య నటీనటులందరూ మెగాస్టార్లు అని.. వాళ్లందరి డేట్లూ కలిసి రాగానే షూటింగ్ మొదలవుతుందని అతను చెప్పాడు. ‘కల్కి’కి సంతోష్ నారాయణన్ మంచి మ్యూజికే ఇచ్చినప్పటికీ.. దాని విషయంలో కొంత మిశ్రమ స్పందన వచ్చింది. కానీ ఈ ఫీడ్ బ్యాక్ను తీసుకుని మరింత బెస్ట్ వర్క్ ఇవ్వడానికే కష్టపడుతున్నట్లున్నాడు సంతోష్. ‘కల్కి-2’ ఈ ఏడాది ద్వితీయార్దంలో సెట్స్ మీదికి వెళ్లొచ్చని అంచనా వేస్తున్నారు.
